HAJYMYRAT AK
Ol 1355-nji h.ş ýylda Kümmet şäherinde dogulýar. Kakasynyň ady Mämmetanna. Hajymyrat Pars dili we edebiýaty ugrunda orta okuw derejesini alansoň, 1374-nji ýylda gulluk wezipesine gidýär. Ak 1383-nji ýylda öýlenýär we azat iş bilen güzeran geçirýär. Ol ýetginjek ýyllaryndan başlap öz ene dilinde goşgy goşmagy tejribe edýär. Türkmensähranyň bu ýaş şahyry klasik we erkin formalarda şygyr ýazýar. Ol öz goşgularynda täze beýan hem mazmunyň gözleginde. Ak häzir Kümmediň Myras adyndaky goşgy we edebiýat jemgyýetiniň agzasy. Onuň eserleri kä neşriýelerde çap edilse-de entek kitap şekilinde neşir edilenok.
GYSGALAR
Ussat Ahunber üçin
GYZGYN SÖZLE
Eý sen güneş, eý sen gyzgyn
Sen sözläňde duýgy ýagýan öz-özüm
Birje gyzgyn sözle
doly ýagaýyn men
Onom
Ýaşyllasyn bu gus-gury kagyzym
78.11
ŞU GOŞGYŇ ADYN BILMEÝÄN
Indi umyt ýokdur gelmegňe
Penjiräni örüp goýjak
Göwnüme göwünlik bermesin gözüm
gapyny-da örüp goýjak
Işik sesi käte meni aldaýar
Ah!
Entek-de
gözenekden ýalkym urýa göwnüme
78.11
UKY
Ýalkymlary ýörtüp tutmak gerek däl
Gabaklary galdyrsak
bakyş aýasyna damýar ýagtylyk
Belki
ýok, ýok, hökman biz ukuda!
Ýogsa nädip beýle dymýar ýagtylyk
78.6
TIKIM
Sanjyp dur ýüregmi igne deý bir zat
Bir çeper barmagyň hyýaly belki
ýaralary tikip dur
82.2
SENMI ÝA GOŞGY
belki goşulmazdy beýle goşgular
Ýöne sen bolsaň goşgy gurysyn!
82.6
IŇ OWADAN GOŞGY
Meň iň owadan goşgym
iň owadan güli
göremde goşular
Şonda bilýän,
döweregme üýşüler
83.2
ÝAŞAMAK
Ömür,
bir mardak suw
Bir gülüň düýbüne
dökülse ýagşy
83.7
Meň ellerim
ýelekleri ýadigär saklaýan
şol suwsuz pudak, şol suwsuz agaç
Seň ganatlaň
söýgini haklaýan
ýuwasyna dönüp gelýän
iň wepaly garlawaç
Ganatlaryň ger
Kamatyňy göreýin
Onsoň ýene gelinçäň
keşbiňi gözümde haýran
saklap duraýyn
84.5
Gözlerimdekä gözleriň
gursagymdan şygyr-şygyr ses gelýär
Bilýän bir-bir agtaryp
okyýýarsyň
ýürek depderim
84.11
RUBAGYLAR
Men kalbymy gulplamadym, ýapmadym
Göz ignäme yşkdan aýry sapmadym
Şährimizde açar bolsa synadym
Seň kalbyňa düşjek açar tapmadym
Rugsat ber bu gije ýatman aglaýyn
Akarlaň öňüni tutman aglaýyn
Üýşüp köşetmäge gelsinler gapa
Ýöne asla diýen etmän aglaýyn!
Gurak sowuk, oba urdy möjekler
El ýüzünde näme görse iýjekler
Bir çyradan ot alynsyn ynama
Oýa-oturyň sönmäwersin ojaklar
***
TAPARYN ALARYN
Ýene şol gözleri görmäne barýan
Ölmän gelsem gök deý gürläp gelerin
Tozan siňen tenim agyr özüme
Bakyşlarna ýuwup durlap gelerin
Göwni belli ýerde durmaz diýdiler
Bir dünýä gursagy dörläp gelerin
Nirde bolsa yzarlap-da taparyn
Duýgymy daşyna düýrläp gelerin
EJIZ
Sen tükenmez suw, bir düýpsüz derýa
Meň dünýäm näme? öllenen kagyz
tolkun güýjüne
pytyrap barýa
Pikriňe çümýän
ýetişmän demim,
Hopukýar ýürek
güýçlüräk urýa
Sen tükenmez suw, bir düýpsüz derýa
Meň dünýäm näme? suw çeken agaç
Agralyp her dem
gark bolup barýa
Sen tükenmez suw, bir düýpsüz derýa
Bir düýpsüz derýa
82.10
GOŞGULAM ÝALY
Ellerine sygdym goşgulam ýaly
Sygdym, doldum, agdym goşgulam ýaly
Jöwenek deý oňa ýagma howlukdym
Tiz soragsyz ýagdym goşgulam ýaly
Bir uçgun gönezlik almadym otdan
Giz howruma çogdum goşgulam ýaly
Ýalňyşýansyň diýdim irkýän pikrime
Öz göwnüme degdim goşgulam ýaly
Eý göwün çykarma sesiň, hak oňky
Oňa syrym bogdum goşgulam ýaly
Aýtmadym dertleri şeýle dolsam-da
Öz içime agdym goşgulam ýaly
Mydam öwdüm, bir setir-de käýmedim
Gabyna bagt sagdym goşgulam ýaly
Buludy çig ýygdym goşgulam ýaly
Ertekileň sesin serpýär ýüregim
Iň düýşli gün dogdum goşgulam ýaly
Ýogsa oň mähri bar, ol kän mähriban
Men habarsyz ýagdym goşgulam ýaly
Beýle gürrüňlerden habary ýok oň
Zyr öz-özüm çogdum goşgulam ýaly
Sessiz ýazyklarmyň ýüzün ýuwar diýp
Oňa başym egdim goşgulam ýaly
84.4
MENDE NÄME ÝAZYK?
Ýüregmi ýygşyrdym oslanmajak ýerlerde
Ýyldyzyň arkasynda, aýyň arkasynda
Tümde seslenen
ýyldyrymlaň ajy gorkusynda
Ýarawsyz serçäň dyrnagynyň arasynda
Özüňe ýeten süýji
çöregiň ýarysynda
Ýüregmi ýygşyrdym belli bolmajak ýerde
Bir şahyra gyzyň şygyrlarnyň nokatlarynda
Şol irki
şol ilki
ýazyp pozan gögümtil hatlarynda
Ýüregmiň sesini ýygşyrdym pikrini edilmejek ýerlerde
Bir jäjek käsäň düýbünde
Ýürek keşipli gülleleň sesleriniň gapdalynda
Bir sigaryň kültabagynyň reňkinde
Bir sazyň synyp çatlan süňňünde
Ýöne sen, ýene sen
tapdyň, aldyň, atdyň, döwdüň
ýakdyň, sowurdyň
Sen, ýene sen
82.6
BIR AGYZ
Sensiz ýola düşmek düşmeýär maňa
göwne getirýän
gitmän oturýan
82
SANAGLY ÇÖPLER
Bir gap sübüşge aldym
Her gije ýatmadan öň
bir çöpün çakýan
Söndürmän saklaýan soňuna gelinçä
Barmaklarmyň dyrnaklarmyň deňine gelinçä
hamym çala ýanynça
Nebsime duýdurmak üçin
ömür kükürdiniň nähil ýanşyny
kül bolşuny
sönşüni
85.1
GARAÝYŞ
Men bir guş
zaman meniň ýeleklerim
Dökülip dur dünýäme
guş ýalagma
83.2
SOŇKY SETIR
Elkyssa
goşgular guşlary söýýär-de
gurşunlary söýmeýär
Guşlar goşgulary söýýär-de
gurşunlary söýmeýär