«عبدالقهّار» ايلين گؤروًپ
صوپوُليًقدان جیًدا بولدي.
باخار
گؤز تيكيپ اوتوُرسانگ دوًزلره غولا
بزأپ دير گؤركانا غیًرميًز لألهسي،
ينه سر سالايسانگ ساغ بيله سولا
گؤگريپدير گوًلوًنگ غیًزيل آلاسي.
يدي بوغوُن چوپان صََحرادا چالار
بيلبيلينگ اووازي اوًلكأني آلار
ير یوًزي بزهنيپ دوًنیأ گؤرك سالار
چیًقار مِرت کوًیوًندن غامي نالاسي.
آقار سوُولار آقيپ باريار، تولقوُنيار
آغاچلار باشيًندا گوًل بار بيلبيل بار
گلدي باخار کوًیدن گيدر غايلي غار
گلدي باخار غايغی غامينگ غالاسي.
دايخان آرمان دؤكِر اِنچمه دِرلِر
بوُ گوًن بيلين باغلاپ پاميًغني اِكر
زَحمِتيندن اِله گلر سيم - وُ - زِر
باخار گلسه جوشار ایًنسان بالاسي.
بوُلاقلار بوُلانيپ آقار زيًيادا
اؤز اوًلكأمده هوشلوُق -دا بار، صاپا-دا
ايليم ميًخمان سؤيهر پأك هِمده سادا
كؤنگليهوشلار صَحرانگ یاشیًل آلاسي.
دوستوُم اوُنوُتماغیًن اِجيز مأتأجي
دوغاميًز دؤووًلسين ظالیًمينگ تأجي
توًیس باخار ديًر درتلر تاپيپ عالاجي
اِركين بولسا آدامزادينگ بالاسي.
هاني بيرجه ییًلغیًر
توًوهلهيده توزاپ باريان سن ميسينگ؟
منليك ميدير يا-دا سنينگ يابشالغانگ؟
اِجيزليگيمی دوُيمادينگ مي؟
ییًلغیًرمادينگ،
ماییًل بولوُپ غاراسام-دا.
اينه ديدهلريم هايقيًريًپ سني
هاراي دیيپ
اوًم اِديأر.
بير ییًلغیًرسانگ،
گؤگرأيسه گرِک تبسيرأن یوًزوًم
سالغیًن آتان چؤل مِنم.
يوغسام ينه توًوهلهيي غوُچارين
سِنم توزان ايچره توزارسيًنگ شوندا
نِبسيم اؤزوًمه-ده آغیًر،
سانگا-دا
هِمأ سنينگ، ايًرباسلانيًنگ اوًچین
اؤزوًمي
هِم-ده آغلادانينگ اوًچین ايكي گؤزوًمي
همِم مِنليك بير گوًن ييًقايسا سني
شوندا ينه من آغلارين
بلكي،
رووا دألسينگ مانگا بِيله دؤزوًمي.
سر اِت
یوًرِگيمدن سؤيگي سيًزيًپ
موُخاپبِته چاييًپ
سانگا هؤدوًر اِديأن، سؤزوًمي.
ديدهلريم تِگهلأپ دوُر ياشيًني
آنگری باش سؤيگیني دوُيدوُرماق اوًچین
بوُلت - بوُلت اِديأر،
باقسانا، ییًلغیًرسانا عِزيزيم!
هاني بيرجه ییًلغیًر!
سونگ، دوًپ دوًز اِده ریس
بؤوهت آلانگني
سونگ ياز بولار، كؤپهلر گوًلكي
غامام آز بولار
دوًنیأ
سؤيمِگه
سؤيوًلمگه
ياشاماغا
ساز بولار،
حؤكمان.
دؤنهيين،
هاني بيرجه ییًلغیًر!
پيًراغی
توًكهنيكسيز توًم گيجأنينگ دانگي بار
حاق نوُروُنيًنگ يالقيًميديًر پيًراغی
گؤز باشيدير اِنچمه دانالاريًنگ
هِم بوُ دوًنیأميزينگ گؤركي چيًراغی .
پيًراغی سؤيمهدي دوًنیه زاديًني
گؤزل عیًشغی اونگ سؤيگوًسي ماغريًپات
گؤز ياش اِتدي هِم دوُشاقلي ايلينه
ديیدي گرك آلماز غیًليچ شايلي آت.
شاخیًر بيلبيل گؤيه غوُشا منگزهيأر
پيًراغیًنگ آديًني ديله آلاندا
گيجه هِم کوًیوًنده اوُقا گيدنده
ينه شول کوًیوًنده ياتيًپ غالاندا.
اؤز دؤوروًنده اوني يانگسيًلان-دا بار
نيچه سؤيمأن، نيچه بولسا چيًتيًپ غاش
بيزهم اِنتأك دينگه شيًغريًن اوقاياس
آياق اؤروًپ عامال اِتمك بيزدن داش.
آيراليًق
آدام دؤرأني بأري، هوشلوُق-دا بار غام-دا بار
نيچه گوًن بأري بولدوُم آيراليًغا گيريپتار.
اوًلكأمدن ساپار اِتديم گليپ دوًشدوًم بوُ يِره
تؤوهرهگمه سر اِتسم داغلار باشي آقجا غار.
باشي ياسديًغا غويدوُم ياتسام ديييپ اول گيجه
کوًیوًم اوبا اوُچرادي يادا دوًشدي يار يار.
آيراليق بير آغیًر يوًك چكرين من يادامان
ساغليق بولسا گچر گوًن، سونگا چاتار اينتيظار.
دوستوُنگ ياريًنگ كؤپ بولسا هوشلوُقدا گِچر دؤوران
دوستي ياريم كؤپ منينگ بولما یوًرِک بيقارار.
غیًش گوًنلري موًديم دأل گچر گيدر ياز گلر
گوًله عاشیًق بيلبيل غوُش شول گوًن آيديًملار اوقار.
شاخیًر تانگرا یوًز توُتوُپ اوندان ساغليًق ديلهيأر
دوستي- ياريًنگ ساغليًغنا، باسيًم تأزهلِن ديدار.
شاخیًرچيًليًق دوُيغوُسي
ديييپديم: سوووُليًنگ غارا بوُلوُتلار
آلتيًن آييًنگ يالقيًميًندان داشدا من،
ياغتيليق غاباليپ دوداق ديًمانسونگ
گوًنديزلر گوًلسِمده گيجه ياشدا من.
تولقوُن لي دريامي بولوُتلي آسمان
گؤچگوًن لي ییًلديًزلار گؤزه ايلهناق
گؤك گؤز ياشي بيلن یوًرِک دوُيغوُسيًن
ياغسا-دا دوُيان يوق، يا من دوُياماق.
دانگدان شِمالينيًنگ ایًزيًندان غاراپ
آغلاميًشلاپ اوتيًر توُقات لي یوًرِک
من بيلن درتدش مي داغ لاريًنگ باشي
دييهرسينگ گؤرهنگده دوُمان ديًر گرِک.
گوًنديزلر گوًنهشينگ غیًزغیًني بولمان
دوُرموُش ياشاييًشا هؤزير غاتاناق
نه اوُميتينگ اؤزي نه-ده سالغیًني
گؤزوًم درياسيًندا تولقوُن آتاناق.
ييًقیًليپ مي باغلار چمن سولوُپ مي؟
بيلبيل گؤيه غوُشلار يِنگيلن يالي
اِرك نيًشاني بولان سِروي آغاچلار
هازانينگ اِثرنه اِنگيلن يالي.
* * *
بير گيجه اوتيًرديًم پيكيره باتيًپ
بيلمهديم شِمال مي یاقیًملي اوواز
ديیدي اوي طاناپيًم اؤزوًنه دارتيًپ:
ديًمماسانگ اؤوروًلر ينه باخار ياز.
بيردن-ده غاليًپديم شوندا آياغا
شول سسينگ بير توًیسلي غیًزغیًني باردي
یوًرِکده عیًشق يالي گؤزل بير دوُيغی
دؤرأپ عاقیًل هوُشوُم غاتدي-دا غاردي.
شوندان سونگ یوًرِگمينگ باغی گؤگهريپ
جاخانا گؤرك غوشدي عاطيًرلي گوًلي
جوشان چشمهسيندن گوًلوًنگ اوًستوًندن
ناغمالار اوقادي سايراق بيلبيلي.
شِهيد حاقدا
باياقدا اوتيًرديًم پيكيره باتيپ
گچميشه اويلانيًپ دوُرموُشي سيًنلاپ
اؤز يانيًمدان اؤزوًم ايچيم گپلهديپ
ديیديم پلك گؤيه يازيًلان كيتاپ.
بولوُپديًر بارچا ايش اؤنگدن بيلينمأن
بيلمهنم دوًنیأنينگ پردهسي بامي
گلجگي حاق، يؤنه گؤزه گؤروًنمأن
غارانگقي گيجأنينگ اِرتهسي يالي.
عاقيًدامدا دؤرأپ ايكي زات يِنه
بيري ایًنسانلاريًنگ اِركاناليًغی
بيري-ده ظالیًميًنگ ياقان اودوُني
سؤندوًرمأگه بولان مرداناليًغی.
غوپوُپدي غوپوُندي سوووُليًپ دوُمان
گوًل تأجه بزهنيپ بوُ گؤزل دنيأ
يؤنه دانگ شِمالي اؤسمزدن اوزال
واطان اؤز اوغلوُنا آغلاپدي كأ-كأ.
غاخريًمانليًق اِشيك گِيينيپ ايلات
تاغوُتلار هاناسيًن تيترهديپدي
آقابالانگ سوُوي بير دريا بولوُپ
ظالیًميًنگ غوشلاريًن پيًتيًراديًپدي.
غوُرشوُنا بسلهنن اودلي اوُچغوُنلار
سوًتِم مكانيندان اوُچوُبدي شوندا
آسمانيًنگ پاتيًراق ییًلديزلاريًندان
بيلمهديم نأچهسي گؤچوًپدي شوندا.
يؤنه باطيًل عؤمري موًدیم دأل اِكن
چوًنکی ياز گلرميش غیًش غوُتاران سونگ
اؤلمك-ده موُقادديس اِكن ایًنسانا
حاقا بولان بورجوُن بِرك بيتيرن سونگ.
چوپان اوغلان
یاشیًل بزهنيپدير غونامليًق غوُمي
چوپانيًنگ دستينده يِدي بوغوُني
گؤزوًندن دوًر دوًومه آقدي بير سالیًم
توُپانلي دريا دهي یوًرِِگنينگ غومي
اوُچرادي يِر بيلن گؤگه
ـ كيمسه دوُيسا كيم دوُيمادي.
چوپان اوغلان یوًزوًن آسمانا توُتوُپ
چاليًپدوُر، چاليًپدوُر
يِدي بوغوُنيًن
داغی شونگا سيًرداش بولانديًر شايات:
آغلاميًشلاپ دوُران غارا بوُلوُت لار
هم صَحرادا ياشا باتان گؤك اوت لار.
... گوًل
بير زامان،
يانگاق لارينگ؛
گوًلهنينگده چؤكوًپدي
شول ماخال
گؤرِن گؤزلرينگ
دوًشوًپدي آلما كؤيوًنه.
باللينگي غوُجاغنگا آليًپ چیًقيًپ ديًنگ
ايكيندي شِمالي
زوًلپلرينگ اؤپوًپدي اوُتانچ حاياسيًز
سنينگ گؤركأنه یوًزوًنگ
شاماغیًنگ اِثِرنه غیًپ غیًزاريًپدي.
گيجه، دنگي دوُشوُنگ، عِزيز بويداشيًنگ
سالام ديييپ سانگا ساري گِلنده
شوندا آي دپأنگه غولاي گليپدي
گؤيه آيدان آينا شؤله دوًشوًپدي
چوًرروًك اويناليًپدي
كأ ـ گوًرروًنگ لر آيديًليًپدي ـ كأ لاله.
آيلار
آيلانيًپدي
ییًللار
يله دؤنوًپدي
باغت غوُشي-دا سانگا سالام بريپدي
(بيلمهديم) بيلبيلدي يا غارغا غوُشدي،
سِنأ غیًزيًل گوًلدوًنگ يا گوًلدهنِم اِي،
موُني بارچا بيليأدي-له: بيليألر...
ينه، آيلار
آيلانيپدي
ییًللار يِله دؤنوًپدي
(بيلمهديم) يوًكله نِن يوًكوًنگ
آغیًرديًمي، يِنگيل
هِي... هِي... دوًنیأ، دوًنیأ
بير زامان موُقاددِس ساچيًنگ داراديًنگ
(شوندا منينگ گؤرهجيمده):
دوًنیأ،
دِگيرمنه مِنگزهدي اِديل
غاسيًنا غاريًليپ ييتيپ گيدنميش
سنينگ يانگانگداقي تايلي ايكي گوًل.
آغاران ساچلار
بير گوًلوًنگ ديليندن اِشيتديم شيله:
آخ! غاليًنگ آدلي بير بِلادان كؤيدوًم
بير زامان گؤركانا گؤزل گوًليديم
ياقدي سولدوُردي-دا بوُ يامان اوُدوُم.
اِنچِمه اوي بيلن دانگ سيًز گيجه لر
يكهليكده كؤپ ساليًم لار داشاردا
ییًلديًزلارا باقا يولا دوًشيأرين
اؤوروًليأرين يِنه گؤزوًم ياشاردا.
آسمانيًنگ گؤزوً-ده گؤزهنهگيندن
مانگا هایبات بيلن آيغیًتلي گوًليأر
دوُرموُشيًم غابالان توًرمهدير زيًندان
بوًرگوًت پنجهسيندن چیًقاسيًم گليأر.
يايا، غیًما غالاما-دا منگزهمز
كيرپيكلر يانان سونگ گؤركانا غاشلار
طبيغاتدا هِر زاديًنگ اؤز واغتي بار
سووغ اوُران سونگ سارالمازمي آغاچلار.
بير زامان هؤوهسيم كؤپدي منينگ-ده
دؤكِرديم گوًلابي، كؤپدي بِزهگيم
من بير دريا گوًلكوًلريم تولقوُندي
گؤيه بريليپدي هوشلوُق گِزهگيم.
بير زامان ميًلغی ييًپ گوًلوًشِن دوًنیأم
ايندي مانگا غارشي اوقوُن گِزأپ دوُر
شول آرزوُولار شول تولقوُنلي گوًلكوًلر
اؤسِن يِله، چؤل سالغیًنا مِنگزأپ دوُر.
ياداديًم دوًنیأدن آغاردي ساچيًم
ايندي مانگا بويداش سيًرداشام غامديًر
آغاران ساچلاريًم مني آقلايار!
اِيسِم كيم غارالي، كيم دير گوًنأكأر؟
ديیسِنگيز بيلمزليك بيلن سوراغی
ديليم دیيمهسه-ده، يوًرك باغیًمدا
يازغیًلي: گوًنأكأر دينگه قاقامديًر!.
سؤيگأ بؤلِكلر
1
بوُ گوًنلر غیًش یوًرِک يازي کوًیسهيأر
باخار دهي اؤزوًنگي گوًله بزأنگده
هايقيًراسيًم گليأ دوستوُنگ من ديييپ
يايي غیًييًپ كيرپيك مانگا گِزأنگده.
2
سني گوًنه منگزِتسِم، گيجهلر ميًداريًم يوق
آييًم-دا سن گوًنوًم-ده، سندن اؤزگه ياريًم يوق.
3
غوُلاغیًنگ
يوًپِك توُتوُسيًن
اؤروًپ يِنگسأ اوقلاديًنگ
شوندا منگ یوًرِِگيم گيتدي ايًرانيًپ
باش اِگديم، سنگ ياراديًلشيًنگ عاجاییًپ
(سوًنگنگوًم تيتيرهييپ)
ديیديم: يارادانيًنگ تاغظيما لاييًق!.
سيًغیًر ساتان« دِگيشمه »
غونگشوُلارا سيًغريًمي ساتجاق دييهمده
سارغیًت اِتده دللال گتير دییدی لر،
شوندان سونگ دؤكوًلدي دوُردي دللاللار
بيزلرينگ آلجاغميًز سيًغیًر ديیديلر.
بوُغا چكيليپدي دییدیم: بوغازديًر
ایًنانمان! گؤرهلي گتير دییدی لر.
غارنيًني سرمهلأپ بارلاپ گؤرِن سونگ
يايقاپ باش لاريًني غیًسيًر دییدی لر.
مالا هي ايرَحمينگ اينمزمي؟! ديييپ
هورلاپسيًنگ حايواني! ياغیًر دییدی لر.
غارا سيًغرينگ موًشتهريسي كؤپ ديييپ
بوُ سيًغريًنگ ايرنگكي غونگوُر دییدی لر.
سيًغريًمي ساتجاق ديیپ آغزيًما آلديًم
آللانديًم دوغانلار آنگنگاليًپ غالديًم!.
* * *
چكيش بِكيش اِدنميزده نيًرخيًني
دییدی لر غالسيًن-دا بيزه-ده بير زات.
بوينوُم بوُروُپ آز! دييِِمده، دییدی لر:
سنگ شانگسيًنگا بوُ واغیًت بازار كِسات.
منينگ غووشانيًمي بيلنلرينده
باغیًران كيشی بولوُپ قیًلديلار پِريات.
من پاخیًرام ایًنانديًم سؤزلِرينه
ساناپ پوُل آلامدا كؤپ بولايديًم شات.
سونگ بوغاز دييپ ساليًپديرلار بازارا
گؤروًنگلر نِنِنگسي يالانا اوُسسات.
دوًشمهدي پوُلوُما بير تاناجيًق هِم
من پاخیًر غاتناديًم بازارا زيًيات.
بوغاز سيًغیًر آلسام ديييپ غیًش ساتديًم
اِنتأگِم آلاماق بولوُپديًر موُردات.
سيًغريًمي ساتجاق ديیپ آغزيًما آلديًم
آللانديًم دوغانلار آنگنگاليًپ غالديًم،
غاچاوِر يانيًنگدا دوُران كيشيدن
ديیسه گِر بير زامان من-ده دِللالديًم!.
بييكلرينگ باش اوُجوُندا
سر اِديأرين آسمانا
بير گؤزوًمدن نالا.
بير گؤزوًمدن بِگنچ
ياشي دؤكوًليأر.
آسمان گؤيه بزهنيپدير
مرجنلري يالپيًلدآشیًپ
گؤزلريمه گؤزل بولوُپ گؤروًنيأر.
نه عاجاییًپ گيجه بولدي من اوًچین
نه عاجاییًپ گيجه بولدي بيز اوًچین
بييكلرينگ باش اوُجوُندا
تيجِنيپ، ديًزيًما چؤكِن ماخاليًم
یوًرِک جيًدا بيلمأن تِلواسا دوًشيأر
بويوُر بويوُر ياش
دوداغیًم ديًمسا-دا گؤزوًم ساقیًنمان
بير سالیًم اويلانيان اوُزاق ییًللارا:
يالاولي اوت
تأزه نان يرينه چيركيرلن كچه
یاقیًمسيًز ايًس،
يؤنه بيردن:
يانان غارا اؤيلرينگ هوُت غوُجاغیًندا
گوًل دسسه گؤگهريپ ـ كؤيوًمه گليأر
سيًنامدان سيًزديًريًپ
غیًغیًراسيًم گليأر،
داد اِديپ سانگا
يؤنه سن اِشيدرمينگ منينگ نالامي؟
آي-دا شيندي بگنجيندن
بيلمن يا-دا غام آستیًندان
يا-دا اوُتانجيندان گؤزه ايلمهيأر
یوًرِگيمده پِتده-پِتده غام ياتيًر
غام آستیًندا غوجالمازدان غارراپ من
دردي چكن بيلر ـ دييهن سؤزلره ـ
اوُيوُپ
پيريم ديييپ
سندن سالغی سورار من
اِي پيًراغیًم
اِي بييكلرينگ بييگي.
دانگ نِم لي گؤزوًم
دانگ نملي گؤزوًم يالباراديًر يارا همیشه
گؤركأنه گؤزِل سن مني سؤيسنگ نه گؤزلليك
اؤلچِگلي عؤموًر باي ليًغی باشدان باشا اِي دوس
سن دهي گؤزِلينگ يولوُنا يويسانگ نه گؤزِلليك.
من سولمالي گوًل سنگ گوًنشينگ جانيًما دركار
عیًشغیًنگدا بوُ جان اودا بيشيپ گؤيه كي غاينار
اوُغروُنگدا عؤموًر آيلاناريًن گؤرمهگينگه زار
من سانسيًزي درگاخيًنگا غويسانگ نه گؤزلليك.
سنگ ياديًنگا پروانه بولوُپ اودا بيشرمِن
سرگشته بولوُپ غم گِيينيپ غوُم دولانار تِن
سيًناما سينگِن سؤزلري دييمأگه یوًرِکدن
بيگانه بيزي، همدمه سايسانگ نه گؤزلليك.
ديل حاسراتيًنگا چِكدي پيًغان دؤكدي گؤزوًم ياش
بوُ ديدهلريم ياغديًغی ياش، كؤپ اِريدِر داش
كؤيدوًرديم عؤموًر ايسلهديگيم سن قاقاديًنگ غاش
سن دهي گؤزلينگ عیًشغینا كؤيسنگ نه گؤزلليك.
سؤيگي حاقدا
آرا داش بولسا-دا بيل قالبیًمداسيًنگ
كأته یوًرِک کوًیسأپ گؤرهسيم گليأر
سیًپالاپ يوپك دهي غارا ساچلارينگ
مانگلاي درلرينگ ني تيًراسيًم گليأر.
صابريًم طاقاتيًم يوق گؤروًپ غوُچماسام
سن وِپادار يالنگيًز منينگ سؤيهنيم
عاقلیًم چاتيًپ گؤزوًم گؤرمِز سؤيگوًليم
سنگ یولوُنگدا اودا دوًشوًپ كؤيهنيم.
منده چيًن ایًخلاص بار سني سؤيمأگه
سنده-ده هؤوأس بار كؤپ سؤيوًلمأگه
سؤيگي اوت ديًر ياقار سني ديسنگ-ده
ايًرضا مِن عیًشغیًنگدا كؤپ كؤییًلمأگه.
آچ گؤزوًنگي
آچ گؤزوًنگي
آقار كِناريًندا اوتوُران چیًنار
بير زامان چيگيتميش يا بير چیًبيًقميًش
سالغیًن آتيًپ ياتان بير غوُري چؤلده:
توزاپديًر، كلپِزليك كهيِنگليك اِتمأن.
شيدیبِم:
يِل گِرشينه موًنوًپ گليپ كنارا
اول ايندي بولوُپديًر:
باشيًني آسمانا گؤتِرِن چیًنار.
اِلينگدن گلمهسه اوًلنگي بولماق ليًق
هي بولماسا، طبیغاتا بير سر سال
ساپاق آل
ساپاق آل
يِنه ساپاق آل.
دينگه ذِهينيمده...
دينگه ذِهینيمده...
جننِتي گؤردوًم
حوًیرلري بيلن
غانداريًلان ياپلار، گوًللري بيلن.
موُندا وِلين
یوًرِکلر
باتيًپديًر لايا،
غوُرچوُقلار ايیيأرلر
باغتاوارلاري.
یوًرِگيم،
توُقاتليًغیًني
جِنگنگلينگ اوًستوًندن ياغسادي اِگر
غوُراپ:
گؤكلوًگيندن، غالمازدي اِثِر.
اِي یوًرِک
گؤزلرينگ غیًريًندا يول ياساپ دوًرلر
نه چوًین غاما باتيًپسيًنگ سن اِي یوًرِک
هازان يلي اوُرموُش دوًنیأنگي مگر؟
بيليأرين تويلارام گوًلدوًرمز سني
چوًنکی ياغشي يؤوسِل، كؤپ ـ نأتجك ـ يِسِر
بيليأرين ساغاتيًنگ هِر بير «تيًقیًندا»
نيچه جانسيًز تِنلر غوُما سِرپيليأر
غوُمي سِرمينألر كؤپ جانسيًز اِللر.
اِي یوًرِک بيليأرين:
عيًشق سووداسي-دا دأل، سنينگ آتاشيًنگ
اِيسِم:
گؤزلرينگ غیًريندا يول ياسان دوًرلر
ایًنسان ليًغا بولان بورجوُنگدان اِثِر.
واطان
اِي واطان
اِي بييك واطان
گوًنمهگوًن بوي آل موُندانام بييكلن واطان
یوًرِگينده عیًشق بسلنن ایًنسان بيز
سن بيزه ماغشوُق، سن بيزه جِنان
سن بيزي دوغران، سن بيزي دونان
عیًشق-دا سانگا پيدا یوًرِکلر بيلن
بوُ دينگه دوُيغی دأل، اینامديًر ـ اینان.